بستغرب جداً من الناس اللي بتتعامل مع الفرحه كإنها شئ حرام !
ليه بتصعبوها وتعقدوها وتغلظوها ؟؟
سهل جداً إنك تفرح ! .. مش مصدقني ؟؟
طب خُد عندك يا سيدي
لما تبقي ماشي وفيه فرح جمبك وتلاقي الاغنيه اللي بتحبها شغاله
مش بتهلل وتفرح وتفضل تدندن معاها ؟؟ ومش بعيد تدخل الفرح وترقص جوه كمان ؟
مش دي فرحه ؟؟
ولما تبقي ماشي في الشارع وتشوف طفله او طفل جميل جدا ماشي مع مامته
ويبصلك .. مش بيبقي نفسك تروح تلعب معاه ؟؟ ويا سلام بقي لو ابتسملك
غصب عنك تلاقيك ابتسمتله وروحتله وقولت لمامته ربنا يخليهولك
مش دي فرحه ؟؟
لما تكون بتشوف ماتش لفرقتك المُفضله وتلاقيها طحنت الفرقه التانيه
وكسبت حتي 1-0 .. مش دي فرحه ؟؟
لما صاحبك يتصل بيك ويقولك انا عايزك معايا في فرح اختي
وتحس ساعتها انك اخوه فعلا وانك سنده وحته منه
مش دي فرحه ؟؟
لما تكون نايم بردان بالليل ومكسل تحط البطانيه عليك
وتلاقي مامتك داخله اوضتك بتتسحب وبتطمن عليك وقامت مغطياك بالبطانيه
مش دي فرحه ؟؟
لما تشوف صوره ع النت لـ كارتون كنت بتحبه زمان
زي الكابتن ماجد و مازينجر و بوكيمون و باباي ..
ومعاه تفتكر اجمل ذكرياتك وانت صغير ..
مش دي فرحه ؟؟
لما تكون ماشي في الشارع وشوفت ست كبيره خايفه تعدي الطريق
وتقوم واخد ايدها معدَيها وتدعيلك دعوتين من قلبها بجد
مش دي فرحه ؟؟
لما تكون نازل خارج مع اصحابك وتفتكر ان ممعكش فلوس
ومامتك تسمعك وانت بتكلمهم وتقولهم مش خارج .. وهي تفهم
تقوم قايمه مديالك حتي 20 جنيه وتقولك لما تشتغل هاخدهم منك وتبتسم إبتسامتها الجميله
مش دي فرحه ؟؟
لما تعمل حاجه غلط واختك تحس بيك وتحس انك مخنوق
تبدأ تحكيلها وتقوم وخداك في حضنها حتي لو اصغر منك
بتحس إن كُل همومك رمتها في حضنها .. وتبدأو تحلو المشكله
مش دي فرحه ؟؟
لما يكون ابوك زعلان منك ومش طايقك وتقوم تعمله فنجان قهوه
وتديهوله وتقوله خلاص بقي يا حاج دا انا زي ابنك يعني
يقوم باصصلك ويقولك انت مش ابني دا انت ابن كلب
ويبدأ يضحك وينسي زعله منك
مش دي فرحه ؟؟
الفرحه موجوده جوه كل واحد فينا .. وفي كل بيت مهما كانت مشاكله
ماتدورش علي النكد وتقوله تعالي انا عايز ابقي مهموم !
دور ع الفرحه وخليها معاك .. في إيدك واقفل عليها
اوعي تخليها تهرب منك .. دي حاجه بتاعتك ومِلكك ومن حقك تفرح
إفرح
