Sunday, January 19, 2014

أمِي مزعلاّني ..

أمي مزعلاني منها أوي .. من ساعه ما خلعت أبويا عشان بيضربني انا وإخواتي ومبيدنيش مصروفي
وهي متغيره معايا .. وبقالها تلات سنين علي دا الحال ..
جالها عريس ما شاء الله رُتبته كبيره اوي في الجيش قولتلها اتعرفو علي بعض ست شهور وبعدين قرري
قعدت مخطوباله سنه ونص !
برغم انهم في مرحله الخطوبه .. بس كان بيضربني برضه وبيشتمني انا وإخواتي
وفضلت اقولها و اعيّطت ليها .. مكانتش بتصدقني .. وكمان كانت بتتفق عليا هي و خيلاني وخالاتي
لغايه ما جبت اخري انا وإخواتي بقي خلاص وعملنا اضراب عن الاكل و اعتصمنا في اوضتنا
قررت تسيب خطيبها دا و بعدها علي طول إتقدملها عريس كان مُتدين اوي
قولت هيتقّي ربنا فينا و فيها طلع مُفتري أكتر من ابويا الأولاني وخطيبها التاني
عشان كان  عنده اهل كتير اوي بقي يخليهم يضربوني أنا وإخواتي واصحابي كمان !
ومنع عننا الأكل والشرب وسرق مننا بيتنا الكبييير .. فضلت ماما جمبنا تعيط وتصرخ ومحدش بيسمعلها
فين وفين لحد ما فكرنا انا وإخواتي وأصحابي في طريقه وعرفنا نهرب من البيت واخدنا ماما معانا
وجبنا اهل الشارع كلهم وطردنا جوزها دا من البيت .. مفيش كام يوم وظهر عريس تاني
اصل ماما حلوه اووي .. شكلها حلو و خيرها كتير وكريمه .. اينعم ساعات بتظلمني انا و اخواتي
بس والله طيبه .. العريس اللي اتقدملها دا بقي يبقي قريب اللي كانت مخطوباله من حوالي سنتين ..
انا خايفه ماما توافق عليه لاحسن يكون زي قريبه .. 
شايفه في عنيها لمعان الحُب للراجل دا .. وشايفه في عنيه رغبه من الجواز من ماما
وانا وإخواتي ملاحظين دا جداً .. فكركو ماما هتوافق علي العريس دا لو اتقدملها ؟

Thursday, January 2, 2014

انا فيمينست اذاً انا حُره ..

اولاً نعرّف يعني ايه فيمينست او الفيمنيزم عموماً بإختصار ..
Feminist , Feminism
هي المرأه اللتي تُنادي بمُساواه المرأه مع الرجل ..

اقتصادياً وسياسياً وإجتماعياً ..
وهي المرأه اللتي تُدافع عن مكانه المرأه في المجتمع

مش المُجتمع الشرقي بس . ولكن فيه مُجتمعات غربيه مُضهده للمرأه

------

نيجي بقي للفيمينست الموضه .. المصريه ..
...

انا فيمينست .. انا فيمينست-

انتي بتتكلمي معايا كدا ليه ؟ انا فيمينست

انتي ليه بتقولي اني غلط ؟ دا انا فيمينست



بت .. تعالي هنا .. انتي تعرفي يعني ايه فيمينست ؟ -


ايوه طبعاً .. فيمينست يعني انا بنت اعمل اللي يعجبني -
وواجب علي المجتمع الفاشل الجاهل المتخلف دا يسيبني اعمل اللي انا عايزاه


واهلاً بكم جوه عقول البنات الهبله اللي بتاخد كل حاجه علي نفسها ..

...

بعض البنات او السيدات نتيجه الكبت المُجتمعي علي تصرفاتهم

ونتيجه البهتان اللي شربه المجتمع المصري من الخليج 
بقو بيتشعلقو في أي مُسمي نسائي وبياخدوه علي نفسهم

بيفصلوه ع اللي عايزين يعملوه .. وتبقي جاهل لو عارضتهم

...


عايزه تشرب سجاير .. عايزه تمشي مع ولاد كتير
عايزه تلبس عريان .. عايزه تتمرقع وهي ماشيه
عايزه تعمل شعرها احمر .. عايزه تلفت ليها الانظار
عايزه تعمل اي حاجه هي مش مقتنعه بيها  اصلا
ولكن عشان يتقال عليها بت بتفهم وتتشهر ..
تقولك انا فيمينست ومن حقي اعمل اللي يعجبني

اوك انتي من حقك تعملي اللي يعجبك
بس ايه اللي دخّل الفيمينزم في كدا ؟؟
الفيمينزم بتاخد منك واجبات اكتر ما بتديكي حقوق
المفروض انك تدافعي عن حقوق النساء غيرك 
مثلاً في قتل الاضطهاد والعُنصريه اللي بيعانو منها
في إنهم يمارسو حياتهم بشكل طبيعي بدون الالتفات لمعتقدات مُجتمعيه فاشله

نفسي البنات تقدر تفرق بين الحقوق وبين الحُريات ..
الحقوق هي المستقبل .. هي الخارطه اللي بتمشي عليها حياتك
هي انك تشتغلي الشُغله اللي بتحبيها .. هي إنهم ميستقلّوش بعقلك او بقدراتك
اما الحريه هي انك بقي تشربي سجاير او تلبسي عريان .. ودا مقدرش احجر عليكي فيه
ومن واجبي احترم رغبتك في إنك تعملي اللي انتي عايزاه 

الفيمينست الموضه هي اللي تتكلم دايماً عن نفسها وعن حقوقها هي
اما مبتتكلمش عن النساء بشكل عام .. ودي زيها زي البتنجان اللي كُله بذر واخره الزباله
الفيمينست الموضه هي اللي لما تقف في طابور كله رجاله مثلا تستعطفهم انهم يمشوها الأول
نظراَ لإنها بنت و كدا .. انتي اللي بتخلقي العنصريه بنفسك بدل ما تحاربيها !
دا غير طبعاً ان الفيمينست الحقيقيه مطلوب منها تعمل جمعيات
وتشتغل في الشارع وتحاول توعّي الناس بضروره دور المرأه في المجتمع
وضروره مُطالبتها بحقّها في مُجتمع كافر بيها وشايف ان دورها مُختزل في بيت ابوها وبيت جوزها وبس

ودا هيكون موضوع تاني هتكلم فيه بعدين ..

المهم نهايه كلامي .. يا بنات يا نساء يا سيدات ياللي فوق راسي ..

وياللي هفضل انادي بحُريتكم وهكرّس حياتي كلها لحقوقكم بعد ماجيب حق الانسان في بلدي
ارجوكم .. متبرروش حريتكم تحت اي مُسمي من المُسميات اللي تخلي غلطكم صح
وياريت قبل ما تفكرو في اللي ليكم فكرو في اللي عليكم
وقبل ما تقولو كلمه ابحثو عنها واعرفو معناها الاول بعدين ناقشوها او انسبوها لنفسكم

الحريه الشخصيه شئ .. والمكانه المُجتمعيه شئ تاني خالص ..