وصيتي ليكم لو مُت

لو مُت صفَو دمِي واتوضو بيه
يِمكن ذنوبي تتغفِر
.وشَفو عضمي وحطَُوه في مكَان اعملوه مقام
 بس حاسبو يتكسر
.خدو نور عينيا إدوها للشعب
يِمكن يفوق وضلامه يتبصر
.خدو بالكو من قلبي
اوعو بنار الغضب يتصهر
.ووزعو رِجلي علي كل عاجز
مش قادر يقف للظلم وكرامته كل يوم تتقِهر

.بيعـو بقيه جُثتي بس اوعو تخلو مصر تتفقر

ما قبل وبعد الثوره

بإسم الثوره احيي الجميع .. الا الاخوان والفلول  :)



طبعا معظم الناس قبل الثوره كانو حاجه وبعد الثوره حاجه تانيه
ودا نتيجه التغيير الرهيب اللي حصل في البلد !
الكل بقي بيتكلم في السياسه وللأسف بيفتي !!
كله بقي بيقول رأيه حتي لو بجهل او بسفاله
قبل الثوره ماكنش حد بيعرف الريس فين اصلا !!
بعد الثوره دلوقتي كل الناس متابعه
اينعم غشيمه وبيصدقو زي الهُبل اي حاجه
بس برضه بيقولو رأيهم وبيتدخلو وبينزلو انتخابات

الشباب والبنات قبل الثوره كانو بيفكرو في الفلوس والاستقرار وتكوين الاسره والجواز
الشباب والبنات بعد الثوره بيفكرو في شفط دخان السحاب وتعبيته جوه ازايز
بيفكرو انهم يعيشو فوق مستوي الارض .. يعيشو عيشه زي بقيه خلق الله
ونفسهم يشوفو مصر من الدول المتقدمه مش من الناميه
نفسهم في حاجات كتير اوي .. وحاسين انها قريبه ! خصوصا انهم بينزلو يهتفو ويصرخو باللي هما عايزينه
لا بقي يهمهم شرطه ولا عسكر و لا بلطجيه .. بقو يعرفو يدافعو عن نفسهم
حتي عندهم إحتمال انهم يموتو وبرضه بينزلو ! اصرار غير طبيعي
البنات مابقتش تافهه زي الاول ! .. او معظم البنات يعني
الاول  كانو يخرجو مع صحابتهم يتمشو وياكلو ويشربو ويضحكو
دلوقتي البنات اللي علي حق بينزلو مسيرات بيطالبو بحقهم وبحق المرأه في المجتمع الفاشل دا !
ماحدش يقول الثوره خراب .. ومحدش يقول ان الثوره كلها عيوب
من غير الثوره ماكنتوش هتكتشفو الجزء الوطني اللي جواكم
ايام مبارك كنتو مكتومين مخروسين .. دلوقتي لا !
إثنو علي دور الثوره في تغيير شخصيتكم من التفاهه للجد !

عاشت الثوره المصريه :)