عشان تعرف حاله الشعب دا بجد .. متختزلش مشاكله و حالته من ورا كواليس اللاب توب في حِته ريبورتاج ولا كام صوره لناس بتاكل من الزِباله ولا كام فيديو لناس بتصرخ فيه وبتنادي بلُقمه العيش ولا شويه اخبار عن انتحار فلان الفلاني بسبب طرده من الشُغل ولا خطف فلانه الفُلانيه لطلب فديه و هكذا ..
انزل كدا الشارع و اسأل اي حد .. سوّاق تاكسي مثلاً و بيّاع خضار و فاكهه و بقّال علي قد حاله و وقوله : عايز الثوره تنجح يا حاج ؟ .. لو كان الراجل دا محترم اوي هيشتمك و يقولك غور من قدامي بس .. دا اذا الموضوع لم يتطور لبعد ذلك! وما اكثر الطوب و الزلط ع الارض .
روح لواحد تاني و قوله : انت نِفسك في ايه ؟ هيقولك شغل اخد منه مرتب ثابت و اجوز عيالي و الاقيلي مكان ان شاء الله حتي يكون اوضه فوق سطح .. نفسي اضمن بكره اني الاقي ليا و لعيالي رغيف عيش ..
او حاول كدا تتكلم مع سواق تاكسي و تقوله احنا لازم نعمل ثوره لطرد فساد المؤسسات و الدوله و مُحاسبه النُظم السابقه و ارجاع حق الشهداء و و و و إلخ .. اكيد متوقع هيتعمل فيك ايه ..
انت مُتخيل انك كـ مُثقف و ثوري نزلت تهتف بـ عيش حُريه عداله اجتماعيه كرامه و انسانيه الناس هتفهمك و تقف معاك ؟ .. او لما بقيت تتناقش في حال البلد و تشرح اختلاف الايدولوجيات و الشيوعيه و الليبراليه و الاناركيه و العلمانيه و الاشتراكيه و البروليتاريا و غيرها من المُسميات اللي لو سمعها اي واحد علي قد حاله من ملايين عامه الشعب في الشارع ممكن يحدفك بالجزمه اللي في رجله " ان كان لاقي جزمه يلبسها " و يقولك ابو امك لـ ابو اللي جابتك هي حصلّت تشتم واحد قد ابوك!
إوعي تتغر و تتنّك علي الشعب بإن انت اللي فاهم و هما جهله و متخلفين .. و لازم تعرف اننا من غير الدعم الشعبي ولا نسوي نِكله حتي ..
وياريت كمان تعرف و تقدّر حجم المُنحدر اللي سقطنا فيه غصب عننا من العشم الزياده في اصلاح 90 مليون شعب و معالجه فقرهم و ثقافتهم و تعليمهم و تشجعيهم للانتاج و الاهتمام بالاقتصاد لـ رِفعه هذا الوطن في ثوره شباب عُزّل اخر حدود لعُنفهم ازازه مولوتوف و طوب ..
هل تتوقع ان جهل و فقر و تخلف و سرقه و فساد بيتزرع بقاله اكتر من 70 سنه هينتهي في سنه ولا اتنين ؟ .. لالالا انت غلط ..
عشان كدا انا قررت اخد استراحه مُحارب من النشاط السياسي فتره و اتجه للنشاط المُجتمعي لإني حاسه ان دا هيثمر اكتر ..
ومحدش يقولي اني ابقي في النشاطين مع بعض! بعيداً عن إن هيكون تشتيت ليا و لتركيزي و وقتي .. الا ان محدش هيثق فيا بمجرد ما يعرف اتجاهاتي السياسيه الاخري .. وانا مش ناقصه اتهامات بالعماله و غيره .. انا واحده عايزه اشتغل في المجتمع دا .. معرفش اقعد فيه و استسلم للواقع و اقول خلاص اديني باكل و بشرب و ميهمنيش غيري .. لا! بدل انا قررت اقعد في البلد دي يبقي ملهاش غير حلّين .. يا التغيير .. يا التغيير :)
